அலை ஓசை

பேராசிரியர் கல்கி அவர்களின் "பொன்னியின் செல்வன்", "சிவகாமியின் சபதம்'' "பார்த்திபன் கனவு", ஆகிய வரலாற்றுப் புதினங்களைப் பற்றி பல பேருக்கும் தெரிந்திருக்கும். ஆசிரியரின் சமூக நாவல்களில் மிகப் பிரபலமானதும், அவருக்கு சாகித்திய அகாதமி விருது வாங்கிக் கொடுத்ததுமான "அலை ஓசை" நாவல், எனக்கு மிகவும் பிடித்தமான ஒன்றாகும்.

'சாலையின் இரு புறத்திலும் ஆலமரங்கள் சோலையாக வளர்ந்திருந்தன. ஆதியும் அந்தமும் இல்லாத பரம்பொருளைப் போல் அந்தச் சாலை எங்கே ஆரம்பமாகிறது, எங்கே முடிவாகிறது என்று தெரிந்துகொள்ள முடியாதிருந்தது. பகவானுடைய விசுவரூபத்தின் அடியும், முடியும்போல், இரு திசையிலும் அடர்ந்த மரக்கிளைகளிடையில் அந்தச் சாலை மறைந்துவிட்டது.'என்று தொடங்கிப் படிக்கத் துவங்குகையில், நாமும் அந்தச் சாலையிலேயே நம் பயணத்தைத் துவக்குகிறோம்.

லிங்க்

சிவகாமியின் சபதம்

சிவகாமியின் சபதம், கல்கி எழுதிய புகழ் பெற்ற தமிழ் புதினமாகும். 12 வருடங்களாக கல்கி வார இதழில் தொடர்கதையாக வெளிவந்த இக்கதை பிறகே ஒரு புதினமாக வெளியிடப்பட்டது. முதலாம் மகேந்திரவர்ம பல்லவன் அரசாண்ட காலத்தில் நடைபெற்ற சம்பவங்களைப் பயன்படுத்தி எழுதப்பட்ட இப்புதினத்தில் முதலாம் நரசிம்ம பல்லவன் என்ற இளவரசன் முக்கிய இடம் வகிக்கிறார்.

கல்கி சஞ்சிகையில் வெளிவந்து பரவலான கவனத்தை ஈர்த்த இந்நாவல் பரஞ்சோதி யாத்திரை,
காஞ்சி முற்றுகை,
பிக்ஷுவின் காதல்,
சிதைந்த கனவு
என நான்கு பாகங்களைக் கொண்டதாகும்.

லிங்க்

குறிஞ்சி மலர் நாவல்

அன்பு நண்பர்களுக்கு திரு நா பார்த்தசாரதி அவர்கள் எழுதி கல்கியில் தொடராக வெளி வந்த முழு நீள நாவல் குறிஞ்சி மலர் லிங்க்
படித்து மகிழுங்கள்...

குறிஞ்சி மலர்

என் நெஞ்சத் தோட்டத்தில்
அவள் நினைவு மொட்டுக்கள்
நொடிக்கு நொடி மலரும்
அதிசய
குறிஞ்சி மலர்

விவேகானந்தரின்

விவேகானந்தரின் பொன்மொழிகள்

• கடவுள் இருந்தால் அவனை நாம் காணவேண்டும், ஆத்மா இருந்தால் அதனை நாம் உணர வேண்டும், அப்படியில்லையென்றால் நம்பிக்கை இல்லாமல் இருப்பது நன்று. பாசாங்கு போடுவதை விட நாத்திகனாக இருப்பதே மேல்.

• உலகின் குறைகளை பற்றி பேசாதே. குறைகளை நோக்கி வருத்தப்படு, எங்கும் நீ குறைகளை காண்பாய். ஆனால், நீ உலகுக்கு உதவி செய்ய விருப்பினால் உலகை தூற்றாதே, குறை சொல்லாதே. குறை சொல்லி உலகை இன்னும் பலவீனப்படுத்தாதே. உலகின் குறைகள், குற்றங்கள் எல்லாம் அதன் பலவீனத்தால் விளைபவை அல்லவா.

• செயல் நன்று, சிந்தித்து செயலாற்றுவதே நன்று. உனது மனதை உயர்ந்த இலட்சியங்களாலும், சிந்தனைகளாலும் நிரப்பு. அவற்றை ஒவ்வொரு நாளின் பகலிலும் இரவிலும் உன் முன் நிறுத்து; அதிலிருந்து நல் செயல்கள் விளையும்.

• வாழ்வும் சாவும், நன்மையும் தீமையும், அறிவும் அறியாமையும் ஆகியவற்றின் கலவைதான் மாயா, அல்லது பிரபஞ்சத்தின் இயல்பு. இவ் மாய்த்துள் நீ எல்லையற்று மகிழ்ச்சிக்காக அலையலாம், ஆனால் நீ தீமையையும் காண்பாய். தீமையின்றி நன்மை இருக்குமென்பது சிறுபிள்ளைத்தனம்.

• உலகில் உள்ள தீமைகளைப் பற்றியே நாம் வருந்துகிறோம். நம் உள்ளத்தில் எழும் நச்சுஎண்ணங்களைப் பற்றி சிறிதும் கவலை கொள்வதில்லை. உள்ளத்தை ஒழுங்குபடுத்தினால் இந்த உலகமே ஒழுங்காகிவிடும்.

"நீ எதை நினைக்கிறாயோ அதுவாக ஆகிறாய் உன்னை வலிமை உடையவன் என்று நினைத்தால் வலிமை படைத்தவன் ஆவாய்!"

விவேகானந்தரின் விவேக கதைகள் லிங்க்

சுவாமி விவேகானந்தரின் சிகாகோ சொற்பொழிவுகள்

வரவேற்புக்கு மறுமொழி - செப்டம்பர் 11, 1893

அமெரிக்க சகோதரிகளே, சகோதரர்களே!

இன்பமும் இதமும் கனிந்த உங்கள் வரவேற்புக்கு மறுமொழிகூற இப்போது உங்கள் முன் நிற்கிறேன். என் இதயத்தில் மகிழ்ச்சி பொங்குகிறது. அதனை வெளியிட வார்த்தைகள் இல்லை. உலகத்தின் மிகப்பழமை வாய்ந்த துறவியர் பரம்பரையின் பெயரால் உங்களுக்கு நன்றி கூறுகிறேன். அனைத்து மதங்களின அன்னையின் பெயரால் நன்றி கூறுகிறேன். பல்வேறு இனங்களையும் பிரிவுகளையும் சார்ந்த கோடிக்கணக்கான இந்துப் பெருமக்களின் பெயரால் நன்றி கூறுகிறேன்.

இந்த மேடையில் அமர்ந்துள்ள பேச்சாளர்களுள் சிலர் கீழ்த்திசை நாடுகளிலிருந்து வந்துள்ள பிரதிநிதிகளைப் பற்றிக் குறிப்பிடும்போது, 'வேற்று சமய நெறிகளை வெறுக்காத பண்பினைப் பல நாடுகளுக்கு எடுத்துச் சென்ற பெருமை, தொலைவிலுள்ள நாடுகளிலிருந்து வந்துள்ள இவர்களைத்தான் சாரும்' என்று உங்களுக்குக் கூறினார்கள். அவர்களுக்கும் என் நன்றி. பிற சமயக் கொள்கைகளை வெறுக்காமல் மதித்தல், அவற்றை எதிர்ப்பு இன்றி ஏற்றுக் கொள்ளுதல், ஆகிய இரு பண்புகளை உலகத்திற்குப் புகட்டிய மதத்தைச் சார்ந்தவன் நான் என்பதில் பெருமை அடைகிறேன். எதையும் வெறுக்காமல் மதிக்க வேண்டும் என்னும் கொள்கையை நாங்கள் நம்புவதோடு, எல்லா மதங்களும் உண்மை என்று ஒப்புக் கொள்ளவும் செய்கிறோம். உலகிலுள்ள அனைத்து நாடுகளாலும் அனைத்து மதங்களாலும் கொடுமைப் படுத்தப்பட்டவர்களுக்கும், நாட்டை விட்டு விரட்டி அடிக்கப் பட்டவர்களுக்கும் புகலிடம் அளித்த நாட்டைச் சேர்ந்தவன் நான் என்பதில் பெருமைப் படுகிறேன். ரோமானியரின் கொடுமையால், தங்கள் திருக்கோயில் சிதைந்து சீரழிந்த அதே வருடம் தென்னிந்தியாவிற்கு வந்து எங்களிடம் தஞ்சமடைந்த அந்தக் கலப்பற்ற இஸ்ரேல் மரபினர்களுள் எஞ்சி நின்றவர்களை மனமாரத் தழுவித் கொண்டவர்கள் நாங்கள் என்று கூறிக் கொள்வதில் பெருமைப் படுகிறேன். பெருமைமிக்க சொராஸ்டிரிய மதத்தினரில் எஞ்சியிருந்தோருக்கு அடைக்கலம் அளித்து, இன்னும் பேணிக் காத்து வருகின்ற சமயத்தைச் சார்ந்தவன் என்பதில் பெருமை கொள்கிறேன்.

என் அருமைச் சகோதரர்களே! பிள்ளைப் பருவத்திலிருந்தே நான் பாடிப் பயின்று வருவதும், கோடிக்கணக்கான மக்களால் நாள் தோறும் இன்றும் தொடர்ந்து ஓதப்பட்டு வருவதுமான பாடலின் ஒரு சில வரிகளை இங்கு, உங்கள் முன் குறிப்பிட விரும்புகிறேன்:

"எங்கெங்கோ தோன்றுகின்ற ஓடையெல்லாம் இறுதியிலே கடலில் சென்று சங்கமாம் பான்மையினைப் போன்றுலகோர் பின்பற்றும் தன்மை யாலே துங்கமிகு நெறி பலவாய் நேராயும் வளைவாயும் தோன்றி னாலும் அங்கு அவைதாம் எம்பெரும! ஈற்றில் உனை அடைகின்ற ஆறே யன்றோ!"

சுவாமி விவேகானந்தரின் சிகாகோ சொற்பொழிவுகள் லிங்க்

பொன்னியின் செல்வன்

பொன்னியின் செல்வன் அமரர் கல்கி (1899-1954) எழுதிய புகழ் பெற்ற தமிழ் வரலாற்றூப் புதினமாகும். 1950 - 1955 ஆண்டு வரை கல்கி வார இதழில் தொடர்கதையாக வெளியிடப்பட்டது. இப் புதினத்துக்குக் கிடைத்த மக்கள் ஆதரவு காரணமாகத் தொடர்ந்தும் பல்வேறு காலகட்டங்களில் இதே புதினத்தைக் கல்கி இதழ் தொடராக வெளியிட்டது. தவிர தனி நூலாகவும் வெளியிடப்பட்டுப் பல பதிப்புக்களைக் கண்டுள்ளது. கி.பி. 1000 ஆம் ஆண்டு வாக்கில் இருந்த சோழப் பேரரசை அடிப்படையாகக் கொண்டு இந்த வரலாற்றுப் புதினம் எழுதப்பட்டிருக்கிறது.

முதல் பாகம் - புது வெள்ளம்

இரண்டாம் பாகம் - சுழற்காற்று

மூன்றாம் பாகம் - கொலை வாள்

நான்காம் பாகம் - மணிமகுடம்

ஐந்தாம் பாகம் - தியாக சிகரம்

பொன்னியின் செல்வன் ஆகிலத்தில் லிங்க்

பொன்னியின் செல்வன் தமிழ் பதிப்பகம் லிங்க்

தமிழை வளர்த்த அறிவியல்

நடைமுறையில் தமிழை வளர்க்க
நாற்றங்கால் அமைத்ததும்,
அறிவியல் உரத்தை
அதிலே தெளித்ததும்,
எதார்த்தத்தைக் கையில்
எடுத்துக் கொண்டதால் தான்.

விமர்சனங்களுக்கு ஆளான
போதும்,
விடாப்பிடியாய்க்
கொள்கைப் பிடிப்பைக் கொண்டது
எழுத்தில் கொண்ட பற்றினால்
தான்.

பொறியியல் வல்லுநரை
இயந்திர உலகம் மட்டுமல்ல,
இயற்றமிழ் உலகமும்
இழந்து நிற்கிறது.

சித. அருணாசலம்,
சிங்கப்பூர்

எண்ணப்பறவை எங்கே சென்றாய் ?

சிறகை விரித்து விட்டாய்
உயர எழும்பி விட்டாய்
உலகை மறந்து விட்டாய்

நீ எங்கே சென்று விட்டாய் ?

நீ சென்ற உலகில் கூட
நிறைந்திருக்கும் உன் வாசகர் கூட்டம்
நீ எழுதும் கதைகளை உன்
கருத்தான கட்டுரைகளை
கண்வழியே புசிப்பதற்காய்
பசித்திருக்கும் கூட்டம் ஒன்று

விஞ்ஞான உலகத்தில்
வியத்தகு வகையில் சிறப்புற்றும்
விடவில்லை அன்னைத்தமிழின் பற்று
விளையாடினாய் இலக்கிய முற்றத்தில்
வாசித்தோம்! அதனாலே
யோசித்தோம் .....

சுஜாதா என்னும்
சிந்தனைச் சிற்பி நீ
செதுக்கிய சிற்பங்கள் ஒவ்வொன்றும்
சொல்லும் கதை பன்முக வடிவங்கள்

"அம்பலம்" வழியே
அணை போட்டு பாய்ச்சினாய்
அன்னைத் தமிழின்
அன்பு இலக்கியத்தை

ஓரிரு எண்ணங்கள் என நீ
ஓராயிரம் கருத்துக்களை பகிர்ந்து
ஓடும் மனத்திரையின் காட்சிகளை
ஓவியமாய் வடித்த எழுத்தோவியன் நீ

பலகலைகள் தேர்ந்து நம் தமிழை
பலமான மொழியாக உயர்த்துங்கள் என்றே
பலமாகக் கத்திய முண்டாசுக் கவி
பாரதியின் கனவுகளை மெய்ப்பட வைக்க
பலதுறைகளிலும் உன் ஆற்றலை
பரிசாகக் கொடுத்தவன் நீ

சிறுகதைகள் மட்டுமல்ல , கட்டுரைகள் மட்டுமல்ல
திரைக்கதை வசனம் கொண்டு
திக்கெட்டும் திகழ்ந்தவன் நீ

தமிழகம் மட்டும் அழவில்லை சுஜாதா
தமிழர்கள் அனைவரின் கண்களிலும் நீர்
தம் வீட்டு இலக்கிய தோட்டத்து ரோஜா
தமை விட்டுச் சென்றதே என்று

உன்னுடல் இம்மண்ணை விட்டு
மறைந்திருக்கலாம்
ஆனால் உன் புகழ் இந்த
மண்ணோடு கலந்தது
அகிலம் முழுவதும் வாழும்
அனைத்துத் தமிழர்களின் மனங்களிலும்
அணையாது ஒளிவீசும் உன் புகழ்

இணையத்தின் மூலம் தமிழ் வளரும் என்று
இடித்துச் சொன்ன வீரத்தமிழன் நீ
இணையமொழி தமிழாக எத்துணை செயல்கள்
இனியவன் நீ ஆற்றினாய்
இதை இனி மறப்பரோ தமிழர்.

சுந்தரத் தமிழில் அற்புத படைப்புகள்
சிரப்புறக் கொடுத்தவனே எங்கள்
சுஜாதா உனது நினைவுடனேயே
சுடரும் எழுத்துக்கள் தெறிக்கட்டும்

உன் புகழ் வாழ்க ! உன் லட்சியம் வாழ்க !
உனை ஈன்ற தமிழன்னை வாழ்க
உன எம் சொந்தமாக்கிய தமிழ் வாழ்க.

அன்புடன்
சக்தி சக்திதாசன்

சுஜாதா - நினைவில் நின்றவை

சுஜாதா என்றொரு பிரபஞ்சம்.

- ருத்ரா

தமிழ்சிற்பியே, தமிழ் இலக்கியத்தை நீ செதுக்கியபோது தெறித்த "சில்லுகள்" தோறும் கம்பியூட்டரின் சொல்லுகள் ஆயின.

"நைலான் கயிறு" மூலம் ஊஞ்சல் கட்டி உன் சிறுகதை விளையாட்டுகளை
தமிழ் வாசகர்களிடையே ஆரம்பித்து வைத்தாய்.

உன் நைலான் கயிறு நடைக்குபிறகு மற்றதெல்லாம் "காயிலான்"
கடைச்சரக்காகி போனது.

காதலாவது..கத்தரிக்காயாவது என்று ஒரு உட்குறிப்பை பொதிந்து வைத்தாலும் உன் கதைகள் லேட்டஸ்டாய் சுடிதார் உடுத்திக்கொண்டு வந்து முன்னே துறுத்திக்கொண்டு குறுகுறுப்பதில் கதையை கோர்க்கும் அச்சகத்து கம்பாசிடர்கள் கூட கணேஷ்களாயும் வசந்த்களாயும் காலரை உயர்த்தி விட்டுக்கொள்வார்கள்.

துப்பறியும் கதைகளை தொடங்கிவைத்தாலும் துப்பு கெட்ட இந்த சமுதாயமே
ஒரு குற்றவாளிக்கூண்டில் நின்று கொண்டிருக்கிறது என்று ஒரு புகைமூட்டமாய் உன் எழுத்துக்களில் நீரோட்டம் காட்டினாய்.

ஆம் நீயும் கூட எங்களுக்கு ஒரு புதுமைப்பித்தன் தான்.

எலக்ட்ரானிக் யுகத்து புதுமைப்பித்தன் நீ.

புதுமைப்பித்தனின் சிறுகதைகளில் கிழிந்த கோரைப்பாய்களும் காரை பெயர்ந்த வீட்டுச்சுவர்களும் செட்டிங் போட்டு உயிர்ப்போடு நிற்கும்.

செட்டியார் கடையில் கடன் வாங்கும் நடுத்தர நத்தைக்கூட்டுக்குள் லாவாவை கொப்புளிக்கத்தெரியாத எரிமலைகள் அரைத்தூக்கத்தில் கிடக்கும்.

நீயோ ப்ராக்டிகலாக அதாவது கற்றதையும் பெற்றதயும் கலக்கலாக்கி ஒரு அமிலக்கரைசலை எழுத்துக்களில் சிறு குழந்தை சாதாரணமாய் ஒண்ணுக்கு போது போல் காகிதங்களை நனைத்திநப்பாய்.

அதில் மெதுவாக தீ மூளுவது கூட ஜெயராஜின் வண்ணப்படத்தில் எழுச்சி காட்டும்.

நீ இன்னொரு புதுமைப்பித்தன் தான்.

இப்படி சொன்னால் அந்த புதுமைப்பித்தன் ஒன்றும்
கோபித்துக்கொள்ளப்போவதில்லை.

மணிக்கொடி நரம்பின் தொப்பூள் கொடி அவனிடம் வேர் விட்டிருந்தது என்றால்
உன்னிடம் அதன் உயிர்மகரந்தங்கள் நிறையவே ஒட்டியிருக்கின்றன.

புதுமைப்பித்தன் கதைகளில் மனிதனின் மனவெளியின் வெடிப்புகள்
உருவெளி ஓவியங்களாய் (ஹாலுசினேஷன்) படம் பிடிக்கப்பட்டிருக்கும்.

போலித்தனத்தின் மீது கண்ணுக்குத்தெரியாத கருந்தேள் ஒன்று கொட்டுவது போல் ஆனால் கொட்டாமலேயே ஒரு சமுதாயவலியை ஊமையாய் "ஓங்காரம்"
செய்து கொண்டிருக்கும்.

உன் கதைகளில் நாகரிகம் விஞ்ஞானப் பூச்சுடன் ஒரு அக்ரிலிக் சாயத்தில்
கண்களை கூச வைத்துக்கொண்டே இருக்கும்.

மரத்துப்போன இந்த பம்மாத்து மனங்களுக்கு நறுக்கென்று ஊசி போட்டு
கருத்து ஊன்றுவதில் ஒரு நுட்பம் உண்டு.

ஒரு திட்பம் உண்டு புதுமைப்பித்தனிலிருந்து பதியம் போட்ட
புதுமைச்சித்தன் நீ.

மக்கள் உணர்ச்சிகளின் மண்ணணுவை அணு அணுவாக
அவன் எழுதினான்.

நீயோ மின்னணுயுகத்தில்
மனிதனின் நிமிடத்துக்குள் கூட
நுழைந்து
அதன் கோடிக்கணக்கான
துடிப்புகளான
நேனோ செகண்டுகளை
ஒரு கரப்பான் பூச்சிபோல
"படம் வரைந்து பாகம் குறித்து காட்டிவிட்டாய்"
அவன் சமுதாயத்தை
தோலுரித்துக்காட்டினான்.

நீயோ
தோலுரிக்காமலேயே
உன் எக்ஸ்-ரே கண்ணால்
அந்த அவலங்களை
நிர்வாணமாக்கினாய்.
அவன் சமூகவிஞ்ஞானத்தை
எங்களுக்கு புகட்டினான்.

நீயோ
ஒரு விஞ்ஞான சமூகத்தை
எங்களுக்கு விளக்கிக்காட்டினாய்.

விஞ்ஞானிகளையும்
உன் பேனாக்களில் அடைத்து
அற்புதம் காட்டினாய்.

ஐன்ஸ்டீன்களையும்
டாக்டர்.

பென்ரோஸ்களையும்
ஸ்டீ·பன் ஹாக்கிங்ஸ்களையும் கூட
எங்கள் நெஞ்சில்
நீங்காமல் நிற்கும்
கதாநாயகர்களாக காட்டியிருக்கிறாய்.
இயல் இசை நாடகம்
என்ற முத்தமிழ் தெரியும் எங்களுக்கு
ஆனால்
நீ தானே
"இயற்பியல் தமிழையும்" (thamiz with physics)
எங்களுக்கு இயல்பாய் ஆக்கினாய்.

அதனால்
இந்த மின்னணு யுகமும்
மின்னஞ்சல் யுகமும்
தமிழின் முகம் மாற்றின.

உன் கதைகளின்
காதலன் - காதலி கூட
உனக்கு வெறும் "பைனரி" தான்.

பூலியன் அல்ஜீப்ராவிலிருந்து
புளிச்சு போன இந்த
காதல் அல்ஜீப்ரா வரைக்கும்
நீ காட்டிய மந்திர வித்தைகள்
எங்கள் மனத்தையெல்லாம்
கட்டிப்போட்டு வைத்திருக்கின்றன.

புளிக்க புளிக்கத் தான்
கள் சுவைக்கும்
என்று
உன் காதல் நாவல்கள்
ஒரு ·பார்முலாவை
உள்ளே
போர்த்திவைத்திருக்கும்.
விஞ்ஞானத்தின்
எந்த மூலையையும்
இனிப்பு தடவி
உன் எழுத்துக்களில்
நீ தரும்போது
தமிழ் வாசகர்களெல்லோரும்
கொள்ளையடிக்கப்பட்டுவிட்டார்கள்.

அப்படித்தான்
இதயத்தின் ஆரிக்கிள்- வெண்டிரிக்கிள் பற்றி
பத்திரிகையில்
நீ பாடம் எடுக்கும் போது
அந்த அற்புதத்தை அறிய
உன் இதயமே
அங்கு வந்து உட்கார்ந்துகொண்டது.

ஆம் அதனால்
அது துடிக்க மறந்தது...
அந்தோ கொடுமை..
இதோ
அந்த லட்சக்கணக்கான கண்களின்
கண்ணணீர் வெள்ளத்தில்
அந்த இதயமும்
வேதனையால் துடித்துக்கொண்டு தான்
இருக்கிறது.

தமிழ் எழுத்துக்களின்
கலைக்களஞ்சியமே!
உன்
கலைக்களஞ்சியத்தை நீயே புரட்டிப்பார்.

சுஜாதா என்ற வார்த்தைக்கு
என்ன அர்த்தம் போட்டிருக்கிறது என்று....
"பிறக்கும்போதே
21-ஆம் நூற்றாண்டை நூல்கண்டாக்கி
பட்டம் விடத்தெரிந்த மேதை."
ஆம்.

காலம் வேகமானது தான்.
அதையும் விட வேகமாக சிந்திக்கும்
ஒளியாண்டுகளை(light years)
உடையவன் நீ.

டேக்கியானின்(tachyon) வேகம்
உன் அறிவின் வேகம்.
காலமானார் சுஜாதா
என்பதைகூட
நீ கட்டுரை எழுதினால்
"சுஜாதாவால் காலம் தோற்கடிக்கப்பட்டது"
என்று தான் தலைப்பு கொடுத்திருப்பாய்.

அதுவே தனி முத்திரை கொண்ட
சுஜாதாவின் space-time எனும்
சுஜாதாவின் மகத்தான பிரபஞ்சம்.

- ருத்ரா

முன்னேற்ற மூல மந்திரங்கள்

முன்னேற்ற மூல மந்திரங்கள்

உலகப் புகழ்பெற்ற விஞ்ஞானி ஐன்ஸ்டீனிடம் ஒருமுறை ஒரு கேள்வி கேட்கப்பட்டது.

“”ரிலேட்டிவிட்டி தியரி என்கிற உங்கள் அரிய விஞ்ஞான உண்மையை நீங்கள் கண்டுபிடிக்காமல் விட்டிருந்தால் இந்த உலகம் என்னவாகி இருக்கும் ?”

ஐன்ஸ்டீன் சிரித்தபடி, “”ஒன்றும் குடி முழுகிப் போய் இருக்காது… வேறு ஒருவர் அதைக் கண்டறிந்து வெளிப்படுத்தி இருப்பார்” என்றார்.

அதிர்ச்சி அடைந்த கேள்வியாளர், “”இன்னொருவர் கண்டறிந்து வெளிப்படுத்த பல ஆண்டுகள் ஆகி விடும் அல்லவா ?” என்று இழுத்தார்.

சிறிது யோசித்த ஐன்ஸ்டீன்… “”அதிகபட்சம் இன்னும் ஒரு மூன்று வாரங்கள் வேண்டுமானால் தள்ளிப்போயிருக்கும். அவ்வளவுதான்”என்றார். ஆம்… இது உண்மை. உலகில் ஒரே ஒரு ஆல்பர்ட் ஐன்ஸ்டீன்தான் இதைக்கண்டறிய முடியும் என்பதில்லை. காரணம் அதே கால கட்டத்தில் பல விஞ்ஞானிகள் பல பகுதிகளில் அத்தகைய சிந்தனைத் தாக்கத்துடன் அதே கோட்பாடுகளைப் பற்றி ஆய்வு செய்து கொண்டிருந்தனர். யார் முந்தப் போகிறார்கள் என்பதற்குத்தான் உலகம் காத்திருந்தது. ஒரு பந்தயம் போல…
வேறு ஜெர்மானிய விஞ்ஞானியும் ரிலேட்டிவிட்டி தியரியின் பல கூறுகளை ஆய்வு செய்திருந்தார்.

ருத்ரன் கருத்துக்கள்

தாழ்வுமனப்பான்மை மற்றும் திக்குவாய் நோயில் இருந்து விடுபடுவது எப்படி?

திக்குவாய் ஏற்படுவதற்கு இரண்டு காரணங்கள் உள்ளன. முதல் காரணம் உடல்சார்ந்த அடிப்படை பிரச்சனைகள். சிலருக்கு பிறப்பி லிருந்தே குரல் நாண் நரம்புகளில் பிரச்சனைகள் இருக்கும். சிலபேருக்கு பயத்தினால் திக்குவாய் வரும். பயத்தினால் வரும் திக்குவாயை மன சிகிச்சைகள் மூலம் குணப்படுத்திவிடலாம். மற்ற படி குரல்நாண் சார்ந்த பிரச்சனைகளுக்கு அதற்கான தகுந்த அறுவைச் சிகிச்சைகள் செய்ய வேண்டும். பிறகு பேசுவதற்கான பயிற்சிகள் உள்ளன. பேசுவதற்கு பழக வேண்டியிருக்கும்.

திக்குவாய் வேறு. தாழ்வு மனப்பான்மை வேறு. நம்மிடம் இது இல்லை என்று குறையை நினைத்துக் கொள்வது, அந்தக்குறையை பெரிதாக்கிக் கொள்வதுதான் தாழ்வு மனப் பான்மை. இதற்கு அடிப்படைக் காரணம், தொடர்ந்து நாம் அடுத்தவர்களைப்பார்த்து ஒப்பிடுவது. அவனைப்போல் நான் இல்லையே என்று திரும்பத் திரும்ப நினைத்துக் கொண்டே இருப்பதால் வருவதுதான் தாழ்வுமனப்பான்மை. இது வராமல் இருப்பதற்கு குழந்தைப் பருவத்திலிருந்தே தயாராக இருக்க வேண்டும். வந்துவிட்டால் சுலபத்தில் போகாது. அதற்கு அமர்ந்து யோசிக்க வேண்டும். நிறைய பேச வேண்டும்.

சின்ன இலக்குகளை வைத்துக் கொண்டு சின்ன வெற்றிகள் பெறவேண்டும். சின்னச் சின்ன வெற்றிகள் வர வர மனதில் சந்தோஷமும் தைரியமும்கூட ஆரம்பிக்கும். தானாகவே நம்பிக்கையின் அளவு அதிகமாகும். அப்போது தாழ்வு மனப்பான்மை குறையும். சின்னச்சின்ன வெற்றிகளை நோக்கி நகரும்போது அதில் முழு முனைப்போடு ஈடுபடும்போது தாழ்வு மனப் பான்மையை உணரக்கூட மனதுக்கு நேரமும் இருக்காது. இடமும் இருக்காது. இது என் வாழ்வில் நான் அனுபவித்துக் கற்றுக்கொண்ட விஷயம்.

அடிக்கடி ஏற்படும் மனச்சோர்விலிருந்து விடுபடுவது எப்படி? எப்பொழுதும் உற்சாகமாக இருப்பது எப்படி?

அடிக்கடி மனம் சோர்வாக இருந்தால் அது நோயின் ஆரம்பமாக இருக்கலாம். எச்சரிக்கையாக பாருங்கள். அது நோயில்லை. எல்லா விஷயத்திற்கும் உடைந்து போவதுபோல் ஆகி விடுகிறது. மனதில் தெம்பில்லை, வலுவில்லை போன்ற நிலை இருந்தால் உங்களுக்கு நம்பிக்கை குறைவு என்று அர்த்தம்.

நாம் இனிமேல் வேலை செய்ய வேண்டியதில்லை என்கிற சலிப்பு வரும்போது கூட நம்பிக்கை குறையும். எனவே வாழ்வை சுவாரசியமானதாக ஆக்கிக் கொள்ளவேண்டும். எப்படி? நீங்கள் நடனம் கற்றுக் கொள்வது அரங்கேற்றம் செய்வதற்காக அல்ல. அந்த நேரத்தை ஆக்கபூர்வமான முறையில் பயன்படுத்திக் கொள்கிறீர்கள் என்பதற்காகத்தான்.
உடற்பயிற்சி சாலைக்குப்போவது அல்லது நடனப்பள்ளிக்கு போவது. அது உங்கள் விருப்பம். எது உங்களுக்குப் பிடிக்கிறதோ அதற்குப் போகலாம்.

இதுபோல ஒன்றில் இருந்து மற்றொன்றுக்கு போகும்போது வாழ்க்கை சுவாரசியமாகும். ஆனால் இது தற்காலிகம்தான். இன்றைக்கு நான் நடன வகுப்பிற்கு போகிறேன். அரங்கேற்றம் செய்ய வேண்டும். பிரபு தேவாவை விட பெரிய ஆளாக வேண்டும் என்று நினைக்கும் போதுதான் பிரச்சனை வரும்.

தற்போதைக்கு இந்தப் பிரச்சனைகளிலிருந்து மீள்வதற்கான வழி என்கிறபோது சோர்வுகள் விலகும். சோர்வுகளை தற்காலிகமாக நீக்கிக் கொள்ளும் அதே நேரத்தில் சோர்வின் காரணம் என்ன? நம் மனதின் செயல்பாடென்ன? மனதின் எண்ணம் என்ன? அதன் தாக்கம் என்ன? என்று கவனிக்கும்போது இந்தப்பிரச்சனைகளுக்கான தீர்வைக் காண முடியும்.

குடும்பத்தில் வரும் பிரச்சனைகளுக்கும், கணவன் மனைவி குடும்ப உறவுகளில் ஏற்படும் விரிசலுக்கும் காரணம் என்ன? நிவாரணம் என்ன?

ஒன்றுமில்லை. எதிர்பார்ப்புதான். நான் அன்பு கொடுக்கிறேன். நீ அன்பு கொடுக்கவில்லை. நான் மிகவும் அன்பாய் இருக்கிறேன் என்பது என் மனைவிக்கு தெரியவில்லை. அவளுடைய அன்பு ஒரு சாக்லேட் வாங்கிக் கொடுப்பது. அவனுடைய அன்பு அவளுக்காக ஏசி பொருத்துவது என்று இருக்கும். ஏசி வாங்கிக் கொடுப்பதில் செலவு அதிகம்தான். ஆனால் சாக்லேட் வாங்கித்தருவதில் இருக்கிற நெருக்கம் அவளுக்குத் தேவைப்படும். அவனுக்கு இது புரியாது. இங்கேதான் பிரச்சனை ஆரம்பிக் கிறது.

அன்பு என்பது கணக்கில்லை என்பது தெரிந்தாலே இது சரியாகிவிடும். கொடுக்கல் வாங்கல் இல்லை. அன்பு என்பது கொடுப்பதற்கு மட்டும்தான். திருப்பிவாங்குவதற்கு இல்லை என்று தெரிந்து கொண்டாலே பிரச்சனை வராது. இது குடும்பத்தில் மட்டுமல்ல. எல்லா இடத்திலும் இருக்கிறது.

தோல்வி ஏற்படும் சமயங்களில் தற்கொலை எண்ணம் வருகிறது. தவிர்ப்பது எப்படி?
தற்கொலை செய்வதற்கான எண்ணம் வருவதற்கு அடிப்படையான காரணம், வாழ்க்கையில் இனி எதுவுமே முடியாது என்று நினைப்பதால்தான். இனி எதுவும் முடியாது என்று எல்லாவற்றையும் செய்து முடித்தபிறகு நினைக்கலாம்.

எல்லாவற்றையும் எப்போது செய்து முடிப்பது? இறக்கும்வரைக்கும் மனிதனுக்கு செய்ய வேண்டிய வேலைகள் இருக்கின்றன. தற்கொலை எண்ணம் என்பது ஒரு தப்பித்தல். வாழ்க்கையை விட்டு ஓடிவிடுகிறேன் என்கிற தப்பித்தல். அது சரியல்ல. உங்களுக்கு அது தோன்றிவிட்ட தென்றால் அதை மாற்றிக்கொள்வது சாத்தியம்.

ஏனென்றால் அதைப்பற்றிய விழிப்புணர்வு இருக்கிறது. ஆனால் நெருக்கமானவர்கள் தற்கொலை எண்ணம் பற்றிச் சொல்லும்போது உடனடியாக அதில் நீங்கள் கவனம் செலுத்த வேண்டும்.

ஏனென்றால் இப்படிச் சொல்பவர்கள் தற்கொலை முயற்சிகளில் ஈடுபடுவதற்கான சாத்தியங்கள் இருக்கின்றன. இது மன அழுத்தத்தின் அறிகுறி. எனவே அடுத்தவர்கள் தற்கொலை எண்ணத்தைப்பற்றி எங்கே பேசினாலும் அதை உடனடியாக கவனத்தில் கொள்ளுங்கள். அதற்காக சிரத்தை எடுத்து அவர்களுடைய பிரச்சனை தீர்க்க முயலுங்கள்.

நமது உள்சக்தியை உணர முயற்சிக்கும் போது மனஅழுத்தம் வருவதுபோல் இருக்கிறது. இதிலிருந்து வெளியில் வருவது எப்படி?

உள்சக்தி என்றால் என்ன? மன அழுத்தம் என்றால் என்ன? இந்த இரண்டு விஷயங்களைப் பற்றி தெரிந்துகொள்ள வேண்டும். அதற்கான அர்த்தங்கள் முக்கியம். உள்சக்தியைத் தெரிந்து கொள்கிறபோது வருத்தங்கள் வரவே வராது. ஏனென்றால் உண்மையை நோக்கி தேடலின் போது இடறலாம்; விழலாம்; ஆனால் வலிக்காது. எவரெஸ்ட் ஏறுகிறவர்கள் எத்தனை முறை விழுந்திருப்பார்கள். அந்த வலி ஒரு பொருட்டாக இருந்திருக்காது. ஏனென்றால் எவரெஸ்ட் சிகரத்தை அடைய வேண்டும் என்பது முக்கியம்.

உள்சக்தி நிஜமாகவே உள்சக்தியாகவே இருந்தால் அதை நோக்கிப் போகிறபோது மன அழுத்தம் வராது. அடுத்தவர் சொல்வதுபோல கற்பனை செய்துகொண்டு லிஃப்டில் போவது போல் குண்டலினி சக்தி மேலே ஏறும் என்று நினைத்தால் அப்போதுதான் மனஅழுத்தம் வரும். ஏனென்றால் அது நடப்பதில்லை.

எதிர்பார்த்தது நடக்காத போது, ஏன் அது கிடைக்கவில்லை. என் கணக்கு தவறா? அல்லது நான் ஆசைப்படுவது தவறா, எனக்கு அந்தத் தகுதி இல்லையா என்று கேட்டு உறுதிப்படுத்திக் கொண்டீர்கள் என்றால், மன அழுத்தம் வராது.

அடுத்தவர்களுக்கெல்லாம் உள்சக்தி தெரிகிறது. எனக்கு தெரியவில்லையே என்று நினைத்தால் மனஅழுத்தம்தான் வரும். எனக்குத் தெரிந்தது என்று சொல்லி ஏமாற்றுபவர்கள்தான் அதிகம். தெரிந்தவர்கள் சொல்வதில்லை.

சுகி. சிவம்

சுகி. சிவம் அவர்களின் படைப்புக்கள்

• ஒளிமயமான எதிர்காலம் : பணக்காரனாவது எப்படி? on Sep 2005
• ஒளிமயமான எதிர்காலம் on Aug 2005
• பூமி கருவறையா? கல்லறையா? on Jul 2005
• ஒத்தி வைக்காதே! உலகம் உன்னை ஒதுக்கி வைக்கும்! on May 2005
• ஒளிமயமான எதிர்காலம் on Apr 2005

வாழ்க வளமுடன்

வேதாத்திரி மகரிஷி — வாழ்க வையகம் வாழ்க வளமுடன்

எல்லாம் வல்ல தெய்வமது
எங்கும் உள்ளது நீக்கமற
சொல்லால் மட்டும் நம்பாதே
சுயமாய்ச் சிந்தித்தே தெளிவாய்
வல்லாய் உடலில் இயக்கமவன்
வாழ்வில் உயிரில் அறிவும் அவன்
கல்லார் கற்றார் செயல் விளைவாய்க்
காணும் இன்ப துன்பமவன்.

அவனின் இயக்கம் அணுவாற்றல்
அணுவின் கூட்டுப் பக்குவம்நீ
அவனில்தான்நீ உன்னில் அவன்
அவன் யார்? நீயார்? பிரிவேது?
அவனை மறந்தால்நீ சிறியோன்
அவனை அறிந்தால்நீ பெரியோன்
அவன் நீ ஒன்றாய் அறிந்தைடம்
அறிவு முழுமை அதுமுக்தி.

- வேதாத்திரி மகரிஷி

மகரிஷி சிந்தனைகள்

ஒரு மயிலைப் பார்க்கிறோம் என்று வைத்துக் கொள்வோம். அந்த மயிலின் உருவம் பார்ப்பவர்களின் கண்களுக்கு வரும்போது அந்தக் கண்களில் மிகச்சிறிய உருவமாக பிரதிபலிக்கிறது. இப்படிச் சுருக்கம் பெற்ற மயிலின் உருவமானது எப்போது மூளை செல்களில் மோதுகிறதோ அப்போது அந்த மூளைச் செல்கள் அதைப் பதிவு செய்து கொள்கின்றன. எப்படி ஒரு ஒலியானது பதிவு நாடாவில் பதிவு செய்யப்படுகிறதோ அதே போல மயிலின் உருவமானது அந்த மயிலைப் பற்றிய தன்மைகள் எல்லாம் அடங்கிய அழுத்த அலையாகச் சுருங்கிப் புள்ளி வடிவில் பதிவாகிறது.

மூளைச் செல்களுக்கு வந்து சேருகிற எந்த அலையானாலும் அது உடனே கருமையத்தால் ஈர்க்கப்பட்டு, உடலில் இருக்கும் சீவகாந்த ஆற்றலின் காரணமாக இருப்பாக வைக்கப்படுகிறது. மயிலைப் பார்த்து உணர்ந்த அனுபவத்திற்கு ஏற்பப் பார்ப்பவருடைய கருமையமானது தன்மை பெறுகிறது. பின்னர் எப்பொழுதேனும் தேவையின் காரணமாகவோ, வேறு தூண்டுதல் காரணமாகவோ, அல்லது வேறு ஏதாவது காரணத்தாலோ மன அலைக்கு அதே அலை வரிசை ஏற்படும் போது, மூளைச் செல்கள் ஏற்கனவே அந்த அலை வரிசையில் விளைந்த பதிவுகளை விரித்துக் காட்டும். அப்படி விரித்துக் காட்டப்படும்போது பார்ப்பவர் பழைய அனுபவங்களையும், உணர்வுகளையும் எண்ணங்களாக நினைவு கூர்ந்திட முடியும். அதே தன்மையில் உணர்வின்பாற்பட்ட அலைகளும், எண்ண அலைகளும், பரு உடலில் ஏற்படும் அனுபவங்களால் விளையும் அலைகளும் கருமையத்துக்கு ஈர்க்கப்பட்டு இருப்பாக வைக்கப்படுகின்றன.

விலங்கினப் பதிவு
ஐயறிவு வரையில் பரிணாமமடைந்த உயிரினங்களுக்கு உணவு உற்பத்தி செய்துண்டு வாழத் தெரியாது. அதனால், தாவர இனம் தவிர மற்ற உயிரினங்கள் வேறு உயிரினங்களைக் கொன்று, உண்டு வாழ்கின்றன. ஆறு அறிவுடைய மனித இனம் ஐயறிவுடைய விலங்கினத்தின் வித்துத் தொடராகவே பரிணாமமடைந்துள்ளது. இதனால், மனிதனிடத்தில் ஓரறிவு முதல் ஐயறிவு வரையுள்ள எல்லா உயிரினங்களின் தேவையுணர்வு, செயல்முறைகள், வாழ்க்கை வழி அனைத்தும் மரபுவழிப் பதிவுகளாக (Hereditary Characters) தொடர்ந்து வந்து கொண்டிருக்கின்றன. விலங்கினத்தின் வாழ்வில் உள்ள மூன்று விதமான செயல்பதிவுகளை மனித இனத்தில் அடையாளம் காணலாம். அவை :-

1. பிற உயிரைக் கருணையின்றித் துன்புறுத்துதல் அல்லது கொலை செய்தல்.

2. மற்ற உயிர்களின் உடலைப் பறித்து உண்ணுதல்.

3. மற்ற உயிர்களின் வாழும் சுதந்திரத்தைத் தன் முனைப்பிலான அதிகாரத்தாலோ, தன்
இன்பத்துக்காகவோ பறித்தல்.

என்பதாகும். இம்மூன்றையும் சுருக்கமாக உயிர்க்கொலை, பொருள் பறித்தல் (திருட்டு), சுதந்திரம் பறித்தல் என்ற மூன்று குற்றங்களாகக் கொள்ளலாம். இம்மூன்று செயல்களும் விலங்கினத்திற்குக் குற்றமாகா. அவற்றிற்கு ஒத்தவை; ஏற்றவை. ஏனெனில், அவற்றிற்கு உணவு உற்பத்தி செய்து உண்டு வாழத் தெரியாது. ஆனால், உழைத்துப் பொருள் ஈட்டிப் பகிர்ந்துண்டு இன்புறும் மனித வாழ்வில் இந்த மூன்று குற்றங்கள் தான் எல்லா வகையான துன்பங்களுக்கும் வாழ்க்கைச் சிக்கல்களுக்கும் காரணங்கள். விலங்கினப் பதிவுகளை நீக்கிச் சிக்கலின்றி வாழ்வோம்.

வாழ்க்கையின் சிற்பி
இன்று மக்களிடை “இவரைக் கெடுத்துவிட வேண்டும்” என்று அவரும் “அவரைக் கெடுத்துவிட வேண்டும்” என்று இவரும் இன்னும் பலப்பல விதத்திலும் தீய எண்ணம் மலிவாகக் காணப்படுகிறது. ஆனால், அந்த எண்ணங்கள் செயல்பட விடாமல் அவரவர்களும் எதிர் நடவடிக்கை மூலம் தடுத்துக் கொண்டு இருக்கிறார்கள். செயலுக்கு வர முடியாத இந்தத் தீய எண்ணங்களின் தொகுதி என்ன ஆகும்? செயலாகாத வரை அவற்றுக்கு நிறைவும் வராதே! அதுதான் இன்றெல்லாம் நாம் காணும் இயற்கை உற்பாதங்களாக – அதாவது புயல், வெள்ளம் என உருவெடுத்து எல்லோருக்கும் துன்பமாக மலர்ந்து கொண்டிருக்கிறது. ஏனெனில், இயற்கையே தான் எண்ணமாக வந்திருக்கிறது. எண்ணமும் இயற்கையின் ஒரு கூறுதான்.

ஒளி ஒன்றுதான். அது ஆற்றிய செயல்களும், விளைவுகளும் பலப்பல. அதுபோல் எண்ணமும் ஒன்றுதான். என்றாலும் அது ஆற்றும் செயலும் விளைவுகளும் கணக்கிட முடியாதன. எண்ணத்தின் விளைவறியாது எண்ணி எண்ணி அது விளைவாகிச் செயலாக மலரும்போது அவற்றைத் தாங்க முடியாமல் மனிதன் திணறுகிறான். அவனே வலையும் விரித்து, அதற்குள் அவனே சிக்கிக் கொள்கிறான். அவரவர் வாழ்க்கையின் சிற்பி அவரவர் எண்ணங்களே.
மறைபொருட்களை உணரும் நிலை

பிரம்மஞானம் உலகில் மக்கள் அனைவருக்கும் பரவாமல் தடைப்பட்டதற்கு ஒரு முக்கியக் காரணம் உண்டு. அதை உணர்ந்து கொண்டு, தக்க முறையில் அந்தத் தடைகளைக் களைய வேண்டும். தடைக்குக் காரணங்களாவன:

அனைத்தியக்க அருட்பேராற்றலான இறைநிலை – பிரம்மம்,
அதிலிருந்து தோன்றிய விண்,
விண் சுழலிலிருந்து தோன்றிய காந்தம்,
காந்தத் தன்மாற்றங்களாகிய அழுத்தம், ஒலி, ஒளி, சுவை, மணம்
– இவற்றின் கடைசி அலை இயக்கமாகிய மனம்.

இவையனைத்தும் மறை பொருட்கள். இவை இல்லையென்று மறுத்துக் கூற முடியாது. இவ்வாறு உள்ளன என்று புலனறிவுக்கு எடுத்துக் காட்டவும் முடியாது. ஆயினும், இவற்றை அறிவதற்காகவே ஆறாவது அறிவு எனும் சிந்தனையாற்றல் மனிதனிடம் அமைந்திருக்கிறது. ஐந்து புலன்கள் மூலம் தோற்றப் பொருட்களை உணர்வது ஐயறிவு.

புலன்கள் மூலம் உணரப் பெறும் பொருட்களுக்கு மூலமான மனம், காந்தம், விண், மெய்ப்பொருள் இவற்றை உணரக்கூடிய அறிவு தான் ஆறாவது அறிவு. புலன்களால் பொருட்களை உணரும்போது மன அலைச்சுழல் மிகவும் விரைவாக இயங்குகிறது. அந்த விரைவு நிலையில் மறைபொருட்கள் விளங்கா. மன அலைச்சுழல் விரைவை அகத்தவச் சாதனையால் குறைத்து, அந்த நுண்ணிய நிலையில் தான் மறைபொருட்களை உணர முடியும்.

மெளனம்

நாம் கருத்தொடராகப் பெற்ற வினைப் பதிவுகளையும், பிறவி எடுத்த பின் ஆற்றிப் பெற்ற வினைப் பதிவுகளையும் தன்மைகளாகப் பெற்றவர்களாவோம். நம் வினைப்பதிவுகள் அனைத்தும் புதையல் போல உயிர் எனும் இயற்கை கம்ப்யூட்டரில் அடங்கியுள்ளன. காலத்தால் மலரும் அப்பதிவுகளின் வெளிப்பாடுகளே எண்ணங்கள், செயலார்வம், நோய்கள், இன்ப துன்பங்கள் யாவுமாகும்.

ஒரு தொழிலதிபர் அல்லது வணிகர் மாதந்தோறும் அல்லது ஆண்டுதோறும் இருப்பிலுள்ள பொருள்களைக் கணக்கெடுப்பது போல எல்லோருமே மாதத்திற்கு ஒரு நாளோ அல்லது ஆண்டுக்குச் சில நாட்களோ ஒதுங்கிக் கொண்டு நம் இருப்பைக் கணக்கெடுக்க மெளன நோன்பு அவசியம்.

இந்தக் கருத்தோடு, தவத்தால் அறிவை அமைதிக்கும், கூர்மைக்கும் கொண்டு வந்து, அகத்தாய்வால் நமது இருப்புகளைக் கணக்கெடுத்து, புதிய திட்டத்தால் ஆக்க வாழ்வுக்கு வழி செய்து கொள்ள வேண்டும். மெளன நோன்பின் உண்மை நோக்கமறிந்து விழிப்புடன் காலத்தைப் பயன்படுத்தி, ஆன்மத் தூய்மையும், வாழ்வின் வளமும் பெறுவோம். தான், குடும்பம், உற்றார், ஊர், உலகம் என்ற ஐந்து பிரிவுகளையும் பல தடவை வாழ்த்தி அமைதி காண்போம்.

அலையின் தன்மை

நமது உடலுக்குள்ளாக இயங்கக் கூடிய உயிராற்றல், அலையாக ஜீவகாந்த சக்தியின் மூலம் எந்தப் பொருளோடு தொடர்பு கொண்டாலும், அந்தப் பொருளின் தன்மைக்கேற்ப மாற்றம் பெறும். நமக்குத் தெரிந்தோ, தெரியாமலோ, எப்பொழுதுமே, கோள்களிடமிருந்தும், பொருட்களிடமிந்தும், மக்களிடமிருந்தும் அலைகள் வந்து கொண்டேயிருக்கும். அந்த அலைகள் சாதகமாகவும் இருக்கலாம், பாதகமாகவும் இருக்கலாம்.

பாதகம் என்பது வெளியிலிருந்து வரக்கூடிய ஆற்றல். நம்மிடையே இருக்கிற ஆற்றல் மீது அதிக அழுத்தம் தருமானால், அதைத் தாங்க முடியாதபோது ஒரு துன்பத்திற்குரியதாக மாறுகிறது. அதைத் தாங்கும் போது அதுவே இன்பமாக மாறுகிறது. நமக்கு எப்பொழுதுமே கோள்களிலிருந்து வரக்கூடிய அலையினாலும், பொருட்களிலே இருந்து வரக் கூடிய அலையினாலும், நாம் செய்கின்ற செயல்களிலேயிருந்து வரக் கூடிய அலையினாலும், அதிகமாகப் பாதிக்கப்படாத ஒரு Steadiness தாங்கும் சக்தி (resistance power) அவசியம்.

அந்த ஆற்றலை ஏற்படுத்திக் கொள்வதற்காக நாம், நமது உடல், உயிர், ஜீவகாந்தம், மனம் இந்த நான்கையும் சேர்த்து ஒவ்வொரு பெளதீகப் பிரிவோடும் இணைக்க வேண்டும். உதாரணமாக, நிலம் என்ற மண்ணை எடுத்துக் கொண்டு அதையே நினைந்து, நினைந்து, நினைந்து மண்ணிலேயிருக்கக்கூடிய ஆற்றலுக்கும், நமக்கும் உறவை ஏற்படுத்தி, எப்போதும் நாம் தூங்கும்போதும், விழித்துக் கொண்டிருக்கும் போதும், எங்கே சென்றாலும் மண்ணிலிருக்கக் கூடிய ஆற்றல் நமக்கு உதவியாகத் தான் இருக்க வேண்டும். நன்மை தான் செய்ய வேண்டும் என்று சங்கற்பம் (Auto Suggestion) செய்து கொள்ள வேண்டும்.

ஆன்மீகக் கல்வி

ஒரு ஆற்றில் திடீரென வெள்ளம் பெருகி வருகிறது. பல மைல்கள் தொலைவு வரையில் மழையே இல்லை. எப்படித் தண்ணீர் வருகிறது? இதன் காரணமறிந்தால் எவ்வாறு ஒரு நாட்டில் திடீரெனப் போர் உண்டாகிறது என்பதை அறியலாம். எங்கோ பல மைல் தொலைவில் நல்ல மழை பெய்திருக்கிறது. இது ஒரு மேடான பூமி. மழைநீர் கடலை நோக்கி ஓடுகிறது. அந்த நீரைத் தான், வறண்ட ஆற்றில் பெரும் வெள்ளமாகக் காண்கிறோம். இதே போல உலக மக்கள் வாழ்வில் கணக்கிட முடியாத துன்பங்கள் நிலவுகின்றன.

எல்லாத் துன்பங்களுக்கும் காரணம், மனிதன் மதிப்பை, மனிதன் அறியாமல் செய்யும் தவறுகள் தான். எப்படி? அறநெறி வழியே வாழ மக்களுக்கு முறையான ‘ஆன்மீகக் கல்வி‘யும் இல்லை; பயிற்சியும் இல்லை. பெரும்பாலான மக்கள் இதனால் பொருள், புகழ், அதிகாரம், புலன் இன்பம் நான்கிலே அளவு மீறிய ஆசையைப் பெருக்கிக் கொண்டு வாழ்கிறார்கள். உண்மையில் மனிதருக்குப் பொருளும், புலன் இன்பமும் வாழ்வில் இன்றியமையாதவை.

ஆயினும், அவற்றைப் பெறத் தனது நேர்மையான முயற்சியும், உழைப்பும் வேண்டும். உழைப்பின்றியே பொருளும், இன்பமும் பெறவேண்டுமென்ற வேட்பே, அதிகாரத்திலும், புகழிலும் அடங்கியுள்ளது. இதனால் தான், உலகம் முழுவதும் மனிதகுலம் பொருள், புகழ், அதிகாரம், புலன் இன்பம் என்ற நான்கில் ஆசையைப் பெருக்கிக் கொண்டு என்றும், எதிலும் நிறைவு பெற முடியாமல், இன்னும் வேண்டும் என்ற முடிவில்லாத, அமைதியில்லாத மனநிலையில் சிக்கிக் கொண்டிருக்கிறது. இறையுணர்வாகிய “பிரம்மஞானம்” பெற்றால் தான், மேலே சொல்லப்பட்ட பேராசைகள் நான்கும் மறைந்து ‘மனநிறைவு‘ உண்டாகும்.

கருவில் திரு உடையார்

ஆத்மதாகம் கொண்ட மனிதன் இந்த நினைப்பிலே உருகி நிற்கும் போது, அந்த நினைப்பானது குருவை அவன் முன் கொண்டு வரும். குரு வருவதற்கு வேறு மார்க்கமேதும் கிடையாது.

ஓர் ஏற்புத் தன்மை இருந்தால் குருதானே இங்கே வருவார். எனவே, குருவைத் தேடி அலைய வேண்டியதில்லை. தன்னை அறிந்து கொள்ள வேண்டும் என்ற ஆர்வம் உயரட்டும். தானாகவே அவனுடைய எண்ணம் உயர்நிலையில் பக்குவப்படட்டும். குரு தானாக வருவார்.

மனிதனுடைய எண்ணம் என்பது என்ன? அது பிரம்மத்தினுடைய சாயை தானே? இயக்கம் தானே எண்ணமாக, அறிவாக இருக்கிறது? உணர்ந்த நிலையில் அறிவாகவும், மயக்க நிலையில் மனமாகவும் அதுவே குறிப்பிடப்படுகிறது. அது தானாக அமர்ந்த நிலையில் பிரம்மமாக உள்ளது. பக்குவப்பட்டவன் நினைத்தால் குருவர வேண்டியதுதானே? (Fraction demands and Totality Supplies).

நம் முன்னோர்கள் செய்த தவப்பயனே குண்டலினி யோகம்

அவ்வாறு குரு வரவேண்டியதைத் தடுப்பது எது? ஏற்கனவே எண்ணியிருந்த எண்ணங்களால் உருவான ஒரு மேடு மத்தியிலே தடுக்கிறது. இதைக் கணித்து உணர்ந்து கொண்டு நல்லதிலேயே மனதை நிலைக்கச் செய்யப் பழகிக் கொள்ள வேண்டும். உங்களுடைய நல்ல கர்மத்தின் விளைவாகத் தான் நீங்கள் இந்த மனவளக்கலையை ஏற்று இருக்க முடியும். அது நீங்கள் நேரடியாகச் செய்த தவப்பயனாக இருக்கலாம்; அல்லது உங்களது பெற்றோர்களுடைய தவப்பயனால் உங்களுக்கு இந்த உணர்வு நிலை கிட்டியிருக்கலாம். பெற்றோர்கள் மூலமாகக் கிட்டும் போது அதை நமது தமிழகத்துப் பெரியவர்கள் “கருவில் திரு உடையார்” என்று ஒரே சொற்றொடரில் வர்ணித்தார்கள்

வாழ்க வையகம் வாழ்க வளமுடன

தமிழ் கவிதைகள்

படிக்காதவன்

அன்று...
தள்ளி வைத்தேன்
பள்ளி நாட்களை
இன்று...
அள்ளிக் கொண்டது
என்னை
எள்ளி நகையாடும்
ஏளன நாட்களும்
ஏழ்மை வாழ்க்கையும்!

பல உயிர்கள் காக்கப்படும்

காதல் செய்யும் முன்பும்
தற்கொலை செய்யும் முன்புன்
சிறிது யோசனை செய்தால்

பல உயிர்கள்
காக்கப்படும்....

தவிர்க்க முடியவில்லை

அழகான பெண்களைப் பார்க்கையில்
அவள் கூட வருபவன் அவள்
அண்ணனாக இருக்க வேண்டும் என்று
மனது வேண்டிக்கொள்வதை
தவிர்க்க முடிவதில்லை

நீ இல்லாத வாழ்க்கையை

நீ இல்லாத வாழ்க்கையை
நடைப் பிணமாய் வாழ்கிறேன்
உன் நினைவுகள் - இன்னும்
உயிராய் ஓடிக்கொண்டிருப்பதால்


தமிழா! இன்னுமா நீ உறங்குகிறாய்?

வங்கக் கடல் மீது
தங்கத் தமிழ் மகனை
சிங்களத்து வெறிநாய்
சங்கறுத்துக் கொல்கிறது
தமிழா! இன்னுமா நீ உறங்குகிறாய்?
வலைவீசி மீன்பிடிக்க
அலைமீது சென்றவனின்
தலைமீது குண்டுவீசும்
கொலைச் செயலும் நடக்கிறது.
தமிழா! இன்னுமா நீ உறங்குகிறாய்?

நாவாய் படைநடத்தி
நாடுகளை வென்ற இனம்
நாள்தோறும் அகதிகளாய்
நாடிழந்து வருகிறது.
தமிழா! இன்னுமா நீ உறங்குகிறாய்?
ஆடையை உலகுக்கு
அறிமுகம் செய்தவனை
ஆடையவிழ்த்து அம்மணமாய்
அடித்து சுட்டுக் கொல்கிறான்
தமிழா! இன்னுமா நீ உறங்குகிறாய்?